A comunicación ambiental é unha estratexia de grande importancia para calquera organización pública ou privada. A mera xeración de informes xa non é suficiente. Hoxe é fundamental servirse de ferramentas como a publicidade sobre soportes físicos ou dixitais, a etiqueta do produto, as presentacións públicas ou as visitas guiadas a instalacións, entre outras cousas, para lles facer chegar ao cidadán e ao cliente o esforzo da entidade pola sustentabilidade.

Museos

A nosa empresa proxecta e crea dotacións para museos e salas de museo, destinadas á difusión e conservación do patrimonio común. Aborda este labor desde unha visión global que vai desde o concepto ata a execución final, e que así integra cada un dos procesos de documentación, ordenación de espazos físicos, creación, comunicación e instalación.

Exposicións

As exposicións deseñadas polo noso equipo de profesionais son tanto itinerantes como temporais. O seu obxectivo é instruír, informar, evocar ou entreter, segundo o tema de que son obxecto e o público ao que están destinadas. O noso traballo é deseñar e desenvolver un produto adaptado ás necesidades específicas de cada caso concreto. Encargámonos de todo: desde a definición inicial á execución, a xestión das itinerancias ou a organización e atención de visitas.

Sinalización

A sinalización interpretativa e direccional son dúas das estratexias máis eficaces para a posta en valor e o aproveitamento turístico e cultural dos espazos abertos. O noso equipo define, deseña, imprime e instala todo tipo de sinais perfectamente integrados no contorno ao cal están destinados: paneis de inicio e de ruta, mesas e atrís, monólitos, báculos, marcos, ...

Publicacións

Libros, guías, carteis, trípticos, despregables, catálogos, contos... O noso equipo de comunicación concibe, redacta, ilustra e maqueta os contidos de todo tipo de publicacións destinadas á divulgación e interpretación do patrimonio natural e cultural ou o turismo. Os nosos clientes só teñen que expresarnos as súas necesidades. Nós encargámonos de todo o demais, incluídas a impresión e a entrega en man.